JessicaRulestheUniverse.com

Sina Rupert Everett at Cary Elwes sa pelikulang Another Country, tungkol sa mga estudyante sa isang boarding school sa Inglatera noong 1930s.

III. ‘Steady, Boys, Steady!’

Taong 1967. Si Paul Bryant, isang bagong empleyado sa Midland Bank, ay naatasang samahan ang manager ng bangko, si G. Keeping, sa paglalakad pauwi. Nagkaroon si G. Keeping ng trauma noong Ikalawang Digmaang Pandaigdig at hindi siya maaaring maglakad nang mag-isa. Pagdating sa bahay ng mga Keeping, nautusan si Paul sa hardin ni Gng Keeping, isang mataray at dominanteng babae. Nakilala din ni Paul ang nanay ni Gng Keeping, si Gng Jacobs, na malakas uminom.

Si Gng Keeping pala ay si Corinna Valance, panganay na anak nina Daphne at Dudley Valance. Si Gng Jacobs ay si Daphne. Matapos ang mga pangyayari sa nakaraang yugto, iniwan ni Daphne si Dudley at nagpakasal kay Revel Ralph. Namatay si Revel sa digmaan, at nag-asawa ulit si Daphne. 70 anyos na siya, at magkakaroon ng salu-salo sa kanyang kaarawan. Inanyayahan nila si Paul na dumalo. Kadarating lamang ni Paul sa bayang iyon at wala pa siyang kakilala roon. Tinanggap niya ang imbitasyon.

23 anyos si Paul, interesado siya sa literatura at sa mga tula ni Cecil Valance, nguni’t di siya nakapasok sa unibersidad dahil siya ang sumusuporta sa kanyang inang maysakit. Bakla si Paul, at noon panahong iyon ay kailangan pa niyang magkubli. Pinagnanasahan niya ang kanyang kasamahan sa trabaho, si Geoff na babaero.

Samantala, ang Corley Court na dating hacienda ng mga Valance ay isa nang boarding school at doon nagtuturo si Peter. Tumutugtog siya ng piano at madalas na sinasamahan niya sa pagtutugtog ang isang maestra, si Gng Keeping. Dadalo si Peter sa kaarawan ni Daphne upang maki-duet kay Gng Keeping.

Nagkakilala sina Paul at Peter sa bangko, at nagkita sila sa salu-salo. Nagkagustuhan ang dalawang bakla, at pagkatapos ng konsyerto ay naghanap sila ng lugar na mapagtataguan sa hardin upang sila’y lalo pang magkakilala.

Matapos ang ilang araw ay binisita ni Paul si Peter sa Corley Court. Habang nagtu-tour sa mga gusali ay naghahanap siya ng kuwarto o sulok kung saan maaari silang mag-isa. Nguni’t parating may dumarating na ibang tao at nahirapan ang dalawa na magkamit ng privacy.